KUR LIRIA TA VRET GUXIMIN

(kushtuar një bije të papunë të një dëshmori të lirisë diku në Republikë)

 

Liria ta ka vrarë guximin

dhe guxim s’të jep

as gjaku i babës,

as shokët e tij

t’u thuash troç shkapërdarëve

se ti ke hise n’shtet më shumë

sesa nipat e mbesat e udbashëve.

 

As gjaku i babës,

as shokët e tij

nuk ta mbushin shtratin e shpirtit me guxim

t’ua bësh copë-copë bastardëve

fjalimet fjalë dhelpre për lirinë.

 

 

SËMUNDJET E LIRISË

 

E dërguan

në dializë lirinë.

 

Ekzaminohet

kur t’ia gjejnë djemtë

epruvetat e gjakut

që kanë humbur

laborantët.

 

 

FALNA ZOT SOT

 

Vijmë në shtëpinë Tënde

në ditën e parë,

të dytën,

të tretën…

të tetën,

të dielën,

të premten,

vijmë me t’dashtë Ty

pa e dashtë Veten,

falna Zot sot.

 

 

SHUMIMI I PLEHRAVE

 

Plehra shumë

n’shkollë,

n’shkallë,

n’udhë,

n’rrugë.

 

Janë cilësi në demokraci.