Veterani i UÇK-së; Luftëtari i vërtetë nuk lufton për para, protestuesit e djeshëm janë tmerri i veteranit

Veteranët po vazhdojnë të shprehin pakënaqësitë sa i përket mospërfshirjes së tyre në Projektligjin për rritjen e pagës minimale.

Kjo çështje ka nxitur debat, teksa dje është mbajtur edhe protesta e thirrur si gjithëpopullore nga Organizatat e dala nga lufta e UÇK-së.

Por me këto kërkesa për rritje pagash nuk pajtohet ish–ushtari i Ushtrisë Çlirimtare të Kosovës, Frashër Oseku.

Veterani dhe njëherit invalidi i luftës, për teve1.info ka deklaruar se nuk e mbështetë protestën e OVL-UÇK-së, sepse sipas tij kjo protestë nuk ka të bëjë asgjë me veteranët e vërtetë.

Sipas tij, shoqatat e dala nga lufta janë mini parti.

“Unë mendoj që këto shoqatat e dalura nga lufta janë mini parti, nuk ka të bëjë asgjë me veteranët e vërtetë. Kështu unë mendoj, pasi që edhe vetë jam veteran, sepse luftëtari i vërtetë nuk lufton për para. Veteranët e vërtetë do të duhej të dilnin në protesta kur u shpallë fajtor Nasim Haradinaj dhe do të duhej të reagonin kur janë marrë në Gjykatë në Hagë. Atëherë do të duhej të bënin protesta të mëdha, por këta shihen bukfalisht që ngasin vetëm pas interesave personale, shkurt këta janë tmerri i veteranit”, tha ai.

Oseku tutje theksoi se dhe vet si veteran dhe invalid i luftës nuk është përfitues i pensionit, teksa tha se në lista ka veteranë të cilët kanë lindur pas luftës.

“Shembull nuk është mirë ndoshta të përmendet por unë vet jam veteran dhe invalid i luftës së UÇK-së, por nuk marr as pension, as asgjë nuk marr. Kurse në lista ka ushtarë të cilët kanë lindur pas luftës dhe ata quhen veteranë, dhe ky është realiteti jonë. Pikërisht këta ngasin për përfitime, dalin në protesta, s’di çka të them tjetër. Është rasti i Lekë Dobrunës, është familja Dobruna, familje patriotike ku fëmijët e tyre kanë lindur nëpër burgje, i cili ka paraqitur në Gjykatë shumë raste të cilat janë paraqitë si veteranë, por që në të vërtetë janë të rrejshëm, dhe asgjë nuk është ndërmarrë në këtë aspekt, sepse iu është dashur për vota”, tha ai.

Kurse sot, tashmë ka nisur takimi mes kryeministrit Albin Kurti dhe përfaqësuesit e organizatave të dala nga lufta, të prirë nga  u.d. i kryetarit të OVL-UÇK-së, Faton Klinaku.

Ky takim po mbahet me dyer të mbyllura, teksa teve1.info do ju mbajë të informuar lidhur me gjithçka që ndodhë në të./teve1.info./

SHARE