Ushtria ukrainase publikon shifrat e fundit të ushtarëve të vrarë rusë

Ushtria e Ukrainës ka publikuar shifrat e fundit të ushtarëve rusë të vrarë në 13 ditë luftë. Sipas të dhënave të Shtabit të Përgjithshëm të forcave ushtarake ukrainase mbi 12 mijë ushtarë rusë janë vrarë dhe 303 tanke janë shkatërruar.

Sipas këtyre të dhënave, ushtria ukrainase ka shkatërruar 80 helikopterë dhe 120 sisteme të artilerisë.

Pushtimi i Ukrainës nga Rusia ka hyrë sot në ditën e 13-të.

Granatimet e ushtrisë ruse vazhdojnë të pengojnë evakuimin e civilëve nga qytetet e rrethuara: Kiev, Mariupol, Sumi dhe Harkiv, thotë Ukraina.

Mediat shtetërore ruse thonë se ushtria ruse është e gatshme t’i rihapë korridoret humanitare.

Ukraina ka refuzuar të hënën propozimin rus për largimin e civilëve, pasi shumë nga rrugët e evakuimit çonin vetëm në Rusi ose në aleatin e saj – Bjellorusi.

Rundi i tretë i bisedimeve për paqe midis Rusisë dhe Ukrainës përfundoi të hënën me pak marrëveshje. Rundi i katërt pritet të zhvillohet sot.

Ministrat e Jashtëm të Ukrainës dhe Rusisë do të takohen këtë të enjte në Turqi.