PËRMALLIM PËR ËNDRRËN E BURGUT TIM

 

Më merr malli shpesh

ta shoh ëndërr lirinë

në dhomën numër 11,

në burgun e qarkut në Prishtinë.

 

Malli më merr ta ndiej

erën e mirë të kajsisë nën grilë

që ngutej

të nxirrte nga sythat

lulet dhe bisqet

që u duheshin aq shumë

studentëve në atë pranverë

dhe ne shokëve të ngujuar

në dhomën numër 11.

 

Shpesh malli më merr

atë diell në gjak ta ndiej,

kur në vend të prindërve

na vinte për vizitë

pa marrë leje prej hetuesinë

e nga rrezet e veta bënte fasha

për plagët tona.

 

Shpesh malli më merr

për atë pranverë t’asaj stine

kur Republika kish tjetër fytyrë.

 

 

KAMXHIKU I DEMOKRACISË

 

Asnjë pikë Kosove

nuk të bulon dot brenda vetes

në mos e ndjefsh

kamxhikun e demokracisë

mbi armiqtë e klasës.

 

LOJA E EUNUKËVE

 

Ky po, ky jo,

jo, jo,

ky jo, ky po,

kjo jo, kjo po,

jo, jo,

kjo po, kjo jo.

 

Vendosin eunukët,

zgërdhihen kurtizanet,

e unë ia marr majëkrahut

në kupë të qiellit

një kënge për Ademin,

por dita ime mbyll veshtë

me dyllë të verdhë.

 

HAIK I PASHKRUAR

…..

…….

…..

 

(Këtë haik të pashkruar dikush mund ta lexojë edhe kështu bardhë,  

me pika në vend të rrokjeve në varg.)

 

SHARE