Dega e Partisë Demokratike të Kosovës (PDK) në Klinë ka reaguar ashpër ndaj, siç e quan ajo, “aktivizimit të vonshëm” të kryetarit aktual të Komunës, Zenun Elezaj, vetëm pak muaj para zgjedhjeve lokale.
Në një postim në rrjetin social Facebook, PDK Klinë shkruan:
“Zenun Elezaj ‘zgjohet nga gjumi’ pas 8 vitesh, nis projekte shkel e shko vetëm pak para fushatës zgjedhore!”
Si shembull konkret, ata përmendin rrugën “Feriz Boja” në lagjen “Dukagjini”, e cila, sipas postimit, është shtruar rishtazi me asfalt, por në mes të saj tashmë ka mbirë bar.
“E njëjta gjendje është edhe në shumë rrugë të tjera – ose çahen dhe bëhen me gropa për një javë, ose mbulohet asfalti me bar,” shkruan më tej dega e PDK-së, duke akuzuar Komunën për abuzim me paranë publike dhe zbatim të dobët të projekteve infrastrukturore.
PDK Klinë e konsideron këtë veprimtari si pjesë të një fushate propagandistike nga Aleanca për Ardhmërinë e Kosovës (AAK), që aktualisht qeveris me komunën, dhe kërkon “hetim të plotë nga organet e drejtësisë” për punimet që cilësohen si “fasadë dhe me cilësi të turpshme.”
“Qytetarët meritojnë llogaridhënie, jo propagandë para votimeve,” thuhet në fund të reagimit të publikuar nga PDK.
![Banner Image](https://www.klina.info/wp-content/uploads/2021/12/263816721_427134165618241_6363395797581697382_n.jpg")
