“Nuk është fundi, shihemi në balotazh!, reagon Sokol Bashota pas raundit të parë

Pas përfundimit të rundit të parë të zgjedhjeve lokale në komunën e Klinës, kandidati i PDK-së për kryetar, Sokol Bashota, ka reaguar përmes një postimi në rrjetet sociale, ku ka falënderuar qytetarët për përkrahjen dhe ka shprehur vendosmërinë për të vazhduar garën deri në fund.

“Faleminderit nga zemra, qytetarë të Klinës!”, shkruan Bashota, duke e cilësuar përkrahjen ndaj tij dhe PDK-së si të jashtëzakonshme.

Ai theksoi se gjatë fushatës ka zhvilluar takime të sinqerta me qytetarët dhe ka bërë një kampanjë të ndershme dhe dinjitoze. Megjithatë, Bashota ka kritikuar kundërkandidatin fitues të raundit të parë, duke e akuzuar për keqpërdorim të resurseve publike në funksion të fushatës zgjedhore.

Njoftimi i plotë:

Faleminderit nga zemra, qytetarë të Klinës!

Pas një fushate të ndershme, me shumë takime, përkushtim dhe bashkëbisedime të sinqerta me secilin prej jush, dua t’ju shpreh mirënjohjen më të thellë për përkrahjen e jashtëzakonshme që i dhatë Partisë Demokratike të Kosovës dhe kandidaturës sime. Besimi juaj ishte më i madh se kurrë më parë dhe ky është vlerësimi më i madh që mund të marrë një ekip politik që punon me zemër për qytetin e vet.
Kundërkandidati im fitoi në rundin e parë duke keqpërdorur paranë publike, përmes asfaltimit të oborreve e shfrytëzimit të pasurive komunale për përfitime elektorale. Kjo nuk është fitore e ndershme, por një dëshmi e qartë se si abuzohet me pushtetin kur mungon morali publik dhe respekti për qytetarin.
Ne, përkundër gjithçkaje, qëndruam të pastër, të përkushtuar dhe krenarë për fushatën tonë dinjitoze.
Ky nuk është fundi, shihemi në balotazh! Me besimin tuaj dhe me forcën e së vërtetës, do të ecim drejt fitores për një Klinë të ndershme, të zhvilluar dhe të barabartë për të gjithë.
Faleminderit për çdo votë, për çdo mbështetje e për çdo fjalë të mirë.
Bashkë vazhdojmë drejt fitores për Klinën tonë!