Klina mirëpret artistë vendorë dhe ndërkombëtarë në Kuadër të Festivalit “Camping Fest”

Komuna e Klinës është bërë sot qendër e gjallë e artit dhe kulturës, teksa kryetari Zenun Elezaj ka pritur në një takim miqësor artistë vendorë dhe ndërkombëtarë nga Klina, Prishtina dhe Polonia. Takimi u zhvillua në kuadër të aktiviteteve të edicionit të shtatë të Festivalit Kulturor “Camping Fest”, i cili organizohet nga OJQ ArtEko me mbështetjen e komunës.

I shoqëruar nga drejtori i Kulturës, Rinisë dhe Sportit, Driton Bardheci, kryetari Elezaj theksoi rëndësinë e këtij festivali për promovimin e trashëgimisë kulturore të Klinës, duke e cilësuar atë si një hap të rëndësishëm drejt ndërtimit të një identiteti kulturor të gjallë dhe të qëndrueshëm për komunën.

Në takim mori pjesë edhe profesori i njohur Xhevdet Pantina, i cili së bashku me mysafirët diskutoi për sfidat dhe mundësitë në fushën e artit dhe kulturës. Të pranishmit ndanë ide dhe përvoja për zhvillimin e mëtejshëm të aktiviteteve artistike në komunë.

“Është kënaqësi e veçantë të shohim që Klina po shndërrohet në një qendër të gjallë të aktiviteteve kulturore dhe artistike. Si komunë, do të vazhdojmë të përkrahim çdo iniciativë që promovon vlerat tona kulturore dhe trashëgiminë tonë të pasur,” u shpreh Elezaj.

Festivali “Camping Fest” po konsolidohet si një platformë e rëndësishme për ndërveprimin kulturor mes artistëve nga Kosova dhe vende të tjera, duke e pozicionuar Klinën gjithnjë e më lart në hartën kulturore të rajonit.