Arben Limanaj falënderon qytetarët e Klinës pas zgjedhjeve: Na duhet reformim i thellë dhe më shumë besim në punë

Kandidati i Lidhjes Demokratike të Kosovës (LDK) për kryetar të Komunës së Klinës në zgjedhjet lokale të 12 tetorit, Arben Limanaj, ka reaguar pas përfundimit të procesit zgjedhor, duke falënderuar qytetarët dhe mbështetësit e LDK-së për besimin dhe përkrahjen e dhënë.

Në deklaratën e tij publike, Limanaj ka theksuar se rezultati i këtyre zgjedhjeve nuk ishte i kënaqshëm, as për subjektin politik që ai përfaqëson, as për të ardhmen e komunës.

“Na duhet një reformim i thellë i strukturave të partisë sonë. Përveç kësaj, besimi dhe puna jonë nuk kanë qenë të mjaftueshme për të arritur rezultatin më të lartë,” është shprehur Limanaj.

Ai ka falënderuar në mënyrë të veçantë të gjithë qytetarët që e kanë mbështetur me votë, si dhe kandidatët për Asamblenë Komunale, duke nënvizuar rëndësinë e bashkëpunimit dhe përkushtimit të secilit anëtar të LDK-së në Klinë.

“Faleminderit Kryetarit të Degës, z. Alban Rraci, anëtarëve të kryesisë, kandidatëve për asamble, vullnetarëve dhe bashkëpunëtorëve. Ju jam mirënjohës,” ka përfunduar ai.

Deklarata e Arben Limanajt vjen pas përfundimit të procesit zgjedhor të 12 tetorit, ku subjektet politike në Klinë kanë filluar të analizojnë rezultatet dhe të paralajmërojnë riorganizime të brendshme.