Një haxhi nga Kosova ka vdekur gjatë kryerjes së haxhit në Qabe.
Lajmin e ka konfirmuar Bashkësia Islame e Kosovës. Në njoftim thuhet se i vdekuri është Acdi Jusufi nga Vushtrria.
Aty thuhet se varrimi i tij është bërë në Meke, raporton IndeksOnline.
Postimi i plotë:
“Të Allahut jemi dhe tek Ai do të kthehemi!”
Njoftojmë besimtarët dhe opinionin e gjerë se sot, më 1 qershor 2025, në mëngjes, në Meke, ka ndërruar jetë haxhi Avdi Jusufi nga Vushtrria, i cili këtë vit ishte në mesin e besimtarëve që udhëtuan drejt vendeve të shenjta për ta kryer haxhin.
Me këtë rast, Myftiu i Kosovës, Naim ef. Tërnava, në emër të Bashkësisë Islame të Kosovës, shpreh ngushëllime për familjen e haxhiut, duke lutur të Madhin Zot që t’ia falë mëkatet dhe ta shpërblejë me Xhenetin Firdeus!
Namazi i xhenazes është falur sot në Qabenë e bekuar me namaz të drekës, ndërsa varrimi i tij u bë në varrezat e Mekës, nën përcjellje edhe të udhëheqësve të haxhit të Kryesisë së Bashkësisë Islame të Kosovës.
Zoti e mëshiroftë dhe e gradoftë me Xhenet, ndërsa familjes së rahmetliut i dhëntë sabër dhe gajret!
