Si të duan vetë
ta interpretojnë ëndrrën në Tabir Saraj,
qoftë edhe nëse fare ëndërr nuk ke parë.
Tabir Saraji,
nga piramidat kështu mijëra vjet,
pak, shumë pak të jep
e shumë, fort shumë të merr,
qofsh pinjoll i familjes besnike të Qyprillinjve,
qofsh Jozef.K i përhershëm apo Mark-Alem modern.
(E shkruar pasi rilexova, nuk e di për të satën herë,
romanin “Pallati i ëndrrave” të Ismail Kadaresë)
PARADIGMAT E FOLJES DËRRMOJ
(Numri njëjës dhe numri shumës,
në të gjitha kohët dhe në të gjitha mënyrat;
metodat e punës: individuale,
grupore, tarafi, kasta, klika, klani, fraksioni e të ngjashme;
qëllimi i ativiteteve: dërrmimi;
rezultatet e planifikimit: dërrmim 100 %)
Numri njëjës, vetëm koha e tashme, sepse na mjafton
Unë dërrmoj (vetveten)
Ti dërrmon (vetveten)
Ai (ajo) dërrmon (vetveten)
Numri shumës, vetëm koha e tashme, sepse na mjafton
Ne dërrmojmë (vetveten)
Ju dërrmoni (vetveten)
Ata (ato) dërrmojnë (vetveten)
(E shkruar pasi lexova romanin omnibus
“Të fshehtat e treguara” të Rexhep Qosjes,
botimet TOENA, Tiranë, 2023)
METODAT E VJETRA NË SHTRATIN E RI
Demokracia sot,
sikur ata dje,
zgjedh metodën,
për shembull,
si me i ra Naimit,
si me i ra Luigjit,
ty apo tjetrit.
Demokracia sot
nuk merr vendim,
për të vënë në listë të zezë
Naim Frashërin,
Luigj Gurakuqin…
Ismail Kadarenë…
sepse ka metodat e veta
të sofistikimit
kundër tyre,
kundër teje,
kundër secilit.
PROMETE
Ty sot
Promete
nuk të lidh
me hekura
Zeusi më,
por ne.
