Presidentja e Kosovës, Vjosa Osmani, të enjten ka zhvilluar takim dypalësh në Bruksel me shefin e NATO-s, Jens Stoltenberg, nga ku iu dha mbështetje në rrugën integruese. Përveç me të, Osmani ka zhvilluar edhe disa takime të tjera për të cilat ka njoftuar të premten.
Ajo ka takuar përfaqësuesin e përhershëm të Turqisë në NATO, Zeki Levent Gumrukcu, të cilit i ka shprehur mirënjohje për mbështetjen e fuqishme turke për ta ndihmuar Kosovën në anëtarësimin në NATO.
“Diskutuam paqen dhe stabilitetin në rajon dhe përpjekjet për t’i ruajtur të arriturat tona të përbashkëta”, ka shkruar ajo në platformën X [ish-Twitter].
Një takim e ka pasur edhe me përfaqësuesit e QUINT-it në NATO, me të cilët Osmani ka thënë se shikuan mundësi kreative për progres dhe integrim euroatlantik.
“Diskutuam mbi sfidat e sigurisë në rajon dhe rolin konstruktiv të Kosovës”, ka shtuar Osmani.
Ndërkohë, bisedë ka zhvilluar edhe me ambasadoren amerikane, Julianne Smith, të cilës i ka thënë se Kosova është e përkushtuar për fuqizimin e partneritetit me SHBA-në.
