Ndalohet përkohësisht qarkullimi i kamionëve mbi 15 tonë, për shkak të vapës së madhe

Zëvendësministri i Infrastrukturës, Hysen Dumrishi, ka njoftuar se prej nesër, më 23 korrik, hyn në fuqi një ndalesë e përkohshme për qarkullimin e automjeteve me peshë mbi 15 tonë në të gjitha autoudhët, rrugët nacionale dhe ato rajonale të Kosovës.

Sipas vendimit, ndalesa do të jetë aktive çdo ditë nga ora 11:00 deri në 17:00 dhe do të zgjasë deri më 28 korrik.

Kjo masë është marrë si përgjigje ndaj temperaturave të larta që po mbretërojnë në vend, të cilat rrezikojnë dëmtimin e infrastrukturës rrugore dhe sigurinë në komunikacion.

Dumrishi ka theksuar se ky vendim mund të rishqyrtohet dhe të ndryshohet në varësi të kushteve klimatike në ditët në vijim.