Irani pretendon për 80 shtetas amerikanë të vrarë në sulmet në Irak

Sipas televizionit shtetëror iranian, në sulmet me raketa balistike mbi bazat ushtarake të Irakut janë vrarë 80 shtetas amerikanë, raporton AA.

Pretendimi erdhi pasi Korpusi i Gardës Revolucionare të Iranit (IRCG) nisën dhjetëra raketa balistike kundër forcave amerikane ushtarake dhe të koalicionit në Irak.

Zëdhënësi i Pentagonit, Jonathan Hoffman, njoftoi se raketat u lëshuan nga Irani dhe shënjestruan të paktën dy baza ushtarake irakiane, ku janë të stacionuar trupat amerikane ushtarake dhe të koalicionit, gjegjësisht në bazat Al-Asad dhe Erbil.

Siç tha Pentagoni, është duke u vlerësuar nëse ndonjë trup amerikan është vrarë apo plagosur në sulme, por nuk dha shenja të menjëhershme të viktimave, shkruan IndeksOnline.

Ministri i Punëve të Jashtme i Iranit, Javad Zarif, në llogarinë e tij në twitter shkroi se Teherani ka “konkluduar masa proporcionale” në përgjigje të vrasjes së javës së kaluar nga SHBA-të kreut të forcës elitare iraniane Quds, Qasem Soleimani, duke shtuar se Teherani nuk po kërkon një luftë me SHBA-të.

Sulmet e mëngjesit të sotëm pasuan pas një seri armiqësish midis SHBA-ve dhe forcave të mbështetura nga Irani, që filluan në fund të muajit të kaluar me vrasjen e një kontraktori amerikan në një bazë amerikane në Irak.

SHBA u kundërpërgjigj me sulme ajrore ndaj milicisë së mbështetur nga Irani, për të cilën thotë se është përgjegjëse për kryerjen e sulmit që vrau dhjetëra persona.

Të martën e javës së kaluar, ambasada amerikane në Bagdad u sulmua nga një grup i militantëve dhe demonstruesve të tërbuar.

SHARE