Komuna e Fushë Kosovës që udhëheqet nga kryetari Burim Berisha është përfshirë në një ‘hallakamë’ tenderuese, për shkak të dyshimeve për favorizime për një tender të shpallur me emërtim ‘Ofrimin e shërbimeve shëndetësore , sociale, arsimore, ambientale dhe administratë e përgjithëshme’ në vlerë prej 1,913,400 eur
Në nëntor 2024 Komuna e Fushë Kosovës kishte shpallur këtë tender, ku në specifikat e tij teknike thuhej se projekti ka për qëllim ofrimin e shërbimeve shëndetësore dhe sociale – përkujdesit social dhe shëndetësor shtëpiak dhe ambulantor përmes mbështetjes së personave ne nevojë të moshuarve që janë të lënë pas dore, të braktisur, dhe të lënduar; të cilët i takojnë grupit më të pafavorshëm në Kosovë.
Në kuadër të kësaj kontrate ishte paraparë të punësoheshin 120 persona, si në vijim: a) Mjek dhe stomatolog në total 15; b) Infermier, laborant, teknik në total 45; c) Për shërbime sociale për punë në QPS dhe institucione tjera në total 15; d) Staf edukativ, edukatore, moter edukatore, mësimdhënës, etj 15 persona dhe e) Mirëmbajtje, higjien. Shofer dhe logjistik në total 30.
Në këtë tender kishin ofertuar një kompani dhe një OJQ, KosovaMed Healthcare Sh.P.K. me çmim prej 1,406,700 euro dhe C.I.K (Caritas Kosova) me çmim prej 1,678,700 euro.
Përkundër që operatori ekonomik KosovaMed Healthcare Sh.P.K. kishte ofertuar me çmim 500 më të ulët se sa parashikimi që e kishte bërë zyra e prokurimit e Komunës së Fushë Kosovës, ky aktivitet i prokurimit ishte anuluar me pretendime për disa gabime në llogaritje të përqindjes së shkallës tatimore.
Burime të Veriu.info nga Komuna e Fushë Kosovës bëjnë të ditur se arsyeja e vërtetë e anulimit të këtij aktiviteti të prokurimit, është fakti se ofertues më çmim më të ulët ka dalë kompania KosovaMed Healthcare Sh.P.K., përderisa C.I.K (Caritas Kosova) ka dalë më çmim mbi 200 mijë më të lartë.
“Deri më tash këtë kontratë e ka pas ‘Caritas Kosova’, sepse e ka fitu në vitin 2022. Komuna po don me çdo kusht që të njëjtën me ia jep prapë Caritas-it dhe për këtë arsye e ka anulu që me i demotivu konkurentët tjerë dhe në shpalljen e ardhshme që u bo me 19 maj fitues të shpallet Caritas-i. Kjo sepse ka disa muaj që dhjetëra punëtor të Caritas-it janë t’u punu në QKMF pa paga, për shkak se kontrata e parë ka përfundu për shkak të shpenzimit të buxhetit të paraparë në kontratë”, ka thënë një burim i Veriu.info nga Komuna e Fushë Kosovës në kushte anonimiteti.
Veriu.info ka hulumtuar këtë rast dhe ka gjetur se C.I.K (Caritas Kosova) ka nënshkruar kontratë tre (3) vjeçare më Komunën e Fushë Kosovës për këto shërbime në fund të vitit 2022, por duke qenë se buxheti i paraparë për të është shpenzuar para kohë, shumë punëtorë që punojnë në kuadër të këtij projekti prej disa muajsh kanë mbetur pa paga dhe Komuna tashmë ka rishpallur tender të ri, në të cilin sipas burimeve të portalit po dëshirohet më çdo kusht të favorizohet C.I.K (Caritas Kosova).
Hulumtimi i Veriu.info ka zbuluar se bashkëpunimi në këtë fushë mes kryetarit të Komunës së Fushë Kosovës, Burim Berisha me C.I.K (Caritas Kosova), që i ka dhënë miliona euro kësaj të fundit nga buxheti komunal, datë rreth një dekadë më parë, pasi që këto dy autoritete kishin nënshkruar marrëveshje edhe në vitin 2015 në vlerë rreth 250 mijë euro.
Foto: Don Viktor Sopi (përfaqësues i autorizuar i ‘Caritas Kosova’) dhe Burim Berisha (kryetar i Fushë Kosovës)
