Uji i pijshëm në Klinë brenda të gjitha standardeve të sigurisë – konfirmon KRU ‘Hidrodrini’ dhe IRSHP

Kompania Rajonale e Ujësjellësit ‘HIDRODRINI’ Sh.A. – Pejë, përmes Njësisë Operative në Klinë, ka njoftuar se furnizimi me ujë të pijshëm nga Fundrruesi nëpërmjet sistemit të ultrafiltrimit dhe procesimit në Fabrikën e ujit në Klinë ka kaluar me sukses të gjitha kontrollet dhe analizat e nevojshme.

Sipas njoftimit zyrtar të publikuar nga Zyra për Media e KRU ‘Hidrodrini’, “bazuar në të gjitha analizat e kryera në vazhdimësi, si nga Laboratori i akredituar nga DAK i KRU ‘Hidrodrini’, po ashtu edhe nga Instituti Rajonal i Shëndetit Publik (IRSHP), që nga faza testuese e deri më sot, uji nga kjo pikë furnizuese është brenda normës, duke kaluar me sukses të gjitha kontrollet dhe testet e nevojshme për sigurinë dhe cilësinë e ujit.”

KRU ‘Hidrodrini’ thekson se rezultatet e analizave të vazhdueshme tregojnë qartë që uji i furnizuar për qytetarët e Klinës përmbush të gjitha standardet e përcaktuara për ujin e pijshëm.

Ky njoftim vjen si garanci për konsumatorët mbi sigurinë dhe cilësinë e ujit që ata marrin çdo ditë nëpërmjet sistemit të furnizimit në këtë komunë.