Policia e Kosovës njoftoi në raportin 24-orësh për katër persona që janë zhdukur ditëve të fundit.
Një rast është regjistruar në Istog më 18 maj, ku një grua ka raportuar në Polici se është zhdukur vajza e saj, duke u larguar nga shtëpia. Autoritetet kanë iniciuar rast dhe është njoftuar edhe prokurori kujdestar.
Një vajzë është zhdukur edhe në Gjakovë, ku prindi i saj ka njoftuar ajo ka dalë nga shtëpia më 21 maj dhe nuk është kthyer më. Rasti është në procedurë hetimore.
Një rast i ngjashëm ka ndodhur edhe në Prishtinë.
“Ankuesi mashkull kosovar ka informuar se vajza e tij viktima femër kosovare është larguar nga shtëpia dhe nuk është kthyer më. Rasti në procedurë hetimore, përderisa është njoftuar edhe prokurori kujdestar”, thuhet në njoftim.
Policia i ka nisur hetimet edhe për një 4-vjeçar nga fshati Akrashticë në Vushtrri, ku dyshohet se të hënën mbrëma ka rënë në kanalin e Libër-Lepencit. Rastin në Polici e ka njoftuar nëna e tij.
“Në vendin e ngjarjes kanë dalë të gjitha njësitë përkatëse të kërkim shpëtimit. Njësitë përkatëse janë duke u marrë me rastin ende”, thuhet në njoftim.
