Prifti Jeton Thaçi bashkë me banorët në terren për shuarjen e zjarrit në Klinë

Një zjarr i fuqishëm ka përfshirë sot disa pjesë të fshatrave të Komunës së Klinës, përfshirë Deiq, Polcë, Videjë, Jagodë, Zajm, Drenoc dhe Pjetërq. Në shuarjen e flakëve kanë marrë pjesë njësitet e zjarrfikësve, Policia, KFOR-i italian, si dhe banorët e zonës, të cilët u angazhuan me gjithë fuqinë dhe vullnetin e tyre.

Nga zjarret janë shkaktuar dëme të shumta materiale, ndër to edhe djegia e një shtëpie, ndërsa rreziqet e tjera lidhen me ndotjen e ajrit, dëmtimin e natyrës dhe pasojat e rënda për mjedisin.

Prifti i Klinës, Jeton Thaçi, i cili ishte i pranishëm bashkë me banorët në vendin e ngjarjes, reagoi për këtë situatë duke kërkuar vetëdijesim dhe ndëshkim për ata që mund të kenë shkaktuar zjarrin. “Dikush besoj duhet me e bre ndërgjegjja! Është momenti të vetëdijesohemi, nëse kjo gjë është bërë nga dora e njeriut! E besa edhe të denohen!”, ka deklaruar ai./Klina info/