Presidentja e Kosovës, Vjosa Osmani ka ftuar partitë politike për të diskutuar lidhur me shtyrjen e zgjedhjeve.
Osmani ka thirrur një takim konsultativ me partitë në mënyrë që të diskutohet për shtyrjen e zgjedhjeve, në bazë të rekomandimit të IKSHPK-së.
Takimi do të mbahet sot në ora 17:00, në Kuvendin e Kosovës.
Kujtojmë se IKSHPK-ja i ka rekomanduar presidentes së vendit Vjosa Osmanit, që zgjedhjet lokale, të parapara më 17 tetor, të shtyhen, për shkak të situatës me COVID-19.
Cilat parti kanë konfirmuar pjesëmarrjen në takimin me Vjosa Osmanin?
Lëvizja Vetëvendosje, Lidhja Demokratike e Kosovës dhe Partia Demokratike e Kosovës janë shprehur të gatshme të marrin pjesë në takim me presidenten, Vjosa Osmani për të diskutuar lidhur me ndikimin e procesit zgjedhor në situatën epidemiologjike në vend.
Sekretari për Media dhe Komunikim në Lëvizjen Vetëvendosje, Arlind Manxhuka ka thënë se LVV “janë të gatshëm të takohen me Presidenten kurdo që ajo i thërret”.
Edhe PDK ka konfirmuar se do të marrë pjesë në takim me presidenten Osmani.
Zëdhënësi i kësaj partie Faton Abdullahu ka thënë se PDK asnjëherë nuk iu është shmangur takimeve institucionale dhe se do të marrin pjesë edhe në takimin e së hënës.
Shefi i Grupit parlamentar të LDK-së Arben Gashi ka thënë se edhe kjo parti do të marrë pjesë në takimin e ftuar nga Presidentja. Por kryetari i LDK-së, Lumir Abdixhiku ka thënë se nuk do të pranojnë një shtyrje të zgjedhjeve.
Ndërkaq, Pal Lekaj ka thënë se AAK ende nuk ka vendosur nëse do të merr pjesë në këtë takim, derisa tha se të hënën do të dalin me njoftim për këtë çështje.
