Pamje nga momenti kur policia shihet duke vënë nën kontroll 27-vjeçarin Agon Zejnullahu, pak kohë para se ai të ndahej nga jeta

Një ngjarje të rëndë që ka ndodhur në orët e para të mëngjesit të sotëm në Lipjan, ku një person ka humbur jetën në rrethana të dyshimta pas një incidenti në rrugë.

Sinjali ka mësuar se bëhet fjalë për Agon Zejnullahun, 27-vjeçar.

Burime të Sinjalit bëjnë të ditur se ai ishte parë nën ndikim të alkoolit, duke lëvizur në mënyrë të pakontrolluar në rrugën “Haradin Bajrami”, ku sulmoi vetura dhe kalimtarë të rastit.

Për Sinjalin rreth këtij rasti ka folur edhe Policia e Kosovës.

“Sot, rreth orës 00:15, Policia ka pranuar informacionin se një person, që dyshohej të ishte nën ndikimin e alkoolit, po sulmonte automjete dhe kalimtarë në rrugën “Haradin Bajrami” në Lipjan. Njësitë policore kanë reaguar menjëherë për të vënë situatën nën kontroll, ndërsa në vendngjarje është thirrur edhe ekipi mjekësor emergjent, i cili i ka ofruar ndihmën e parë personit në fjalë”.

“Përkundër përpjekjeve, është konstatuar se ai kishte ndërruar jetë. Në vendin e ngjarjes kanë dalë njësitë relevante hetimore dhe Prokurori për Krime të Rënda. Janë ndërmarrë të gjitha veprimet hetimore për ndriçimin e rastit, përfshirë sigurimin e provave materiale dhe intervistimin e dëshmitarëve”.

Gjithashtu, në lidhje me rastin është intervistuar një dëshmitar, i cili ka deklaruar se ishte sulmuar nga Agon Zejnullahu pak çaste para se të ndodhte vdekja.