Kryetari i Kuvendit, Glauk Konjufca, e ka dërguar Projektligjin për Këshillin Prokurorial në Komisionin e Venecias, për të marrë opinion nga ky institucion ligjor e i pavarur.
Kuvendi njoftoi të dielën se Konjufca ka kërkuar opinion të tërësishëm mbi Projektligjin pasi Drafti është ndryshuar që nga vlerësimi i Komisionit të Venecias.
Në komunikatë u tha se Kosova mbetet e përkushtuar ndaj respektimit të parimeve themelore të demokracisë.
“Në përputhje me përgjegjësitë e tij kushtetuese, kryetari i Kuvendit të Republikës së Kosovës, Glauk Konjufca, ka dërguar për mendim në Komisionin e Venecias Projektligjin për Ndryshimin dhe Plotësimin e Ligjit Nr. 06/L-056 për Këshillin Prokurorial të Kosovës. I njëjti është proceduar në Kuvend ditë më parë nga ana e Qeverisë së Republikës së Kosovës. Duke qenë se drafti ka pësuar ndryshime që nga vlerësimi i Komisionit të Venecias, kryetari Konjufca ka kërkuar opinion për projektligjin në tërësi, duke e konsideruar si vendimtare në arritjen e objektivit për reformim të Këshillit Prokurorial të Kosovës dhe adresimit të shqetësimeve dhe çështjeve të ngritura më parë. Si shtet anëtar i Komisionit të Venecias, Kosova mbetet e përkushtuar ndaj respektimit të parimeve themelore të demokracisë, të drejtave të njeriut dhe sundimit të ligjit”, thuhet në njoftimin e Kuvendit.
