Hajdin Morina ZOGJTË IKËN

 

Zogjtë ikën e zogjtë po ikin,

janë të vetmit që s’e durojnë dot

të verdhët anemik të vjeshtës.

 

PA HIPODROM

 

Është mirë mbi kalë,

vërtet,

sepse gjurmët

të mbeten vetëm në yzengji,

por pa hipodrom

s’ke ku e lëshon kalin në galop.

 

ERA LUAN ME GJETHE

 

Me trungje

era nuk luan dot,

as vals, as tango,

as valle fokstrot.

 

SOT E MOT

 

Në çiflig sot e mot

kush mbjell nuk korr.

 

NUK ECIN RRUGËT

 

Tash rrugët nuk ecin,

gjarpërojnë ndër mua

si shtretërit e lumenjve të shterur.

 

LINDI NË PERËNDIM

 

Buzëmbrëmja zgjati dy ditë,

sepse dielli nuk ra në det,

u mbush zjarr e lindi edhe një herë

për dritën e syve tanë.

 

 

 

SHARE