Sveçla urdhëron IPK-në për hetimin e policëve “për çdo lëshim apo përfshirje të mundshme” në lidhje me Mefail Shkodrën

Ministri në detyrë i Punëve të Brendshme, Xhelal Sveçla, ka njoftuar se ka urdhëruar Inspektoratin Policor të Kosovës që të nisë hetimet për çdo lëshim apo përfshirje të mundshme të pjesëtarëve të Policisë së Kosovës në veprimtarinë kriminale të Mefail Shkodrës, i cili është në kërkim për vrasjen e trefishtë në Gjilan.

Në një deklaratë, ministri Sveçla theksoi se ka kërkuar angazhimin maksimal të strukturave për garantimin e integritetit personal dhe profesional të çdo shërbyesi publik në vend.

Ai u shpreh i pakompromis në mbështetjen e koordinimit ndërinstitucional për krijimin e institucioneve kredibile dhe në shërbim të qytetarëve.

“Askush nuk është i paprekshëm apo i pandëshkueshëm, veçanërisht brenda një institucioni që ka për mandat parandalimin dhe luftimin e veprimtarive ilegale”, tha ministri.

Ai gjithashtu bëri apel që edhe drejtësia të veprojë me të njëjtën vendosmëri për të siguruar një ambient ku sundojnë siguria, rendi dhe ligji në Republikën tonë.

Brenda kompetencave të mia kam urdhëruar Inspektoratin Policor të Kosovës që të angazhohet në hetimin e çdo lëshimi apo përfshirjeje të mundshme të ndonjë pjesëtari të Policisë së Kosovës në veprimtarinë kriminale të Mefail Shkodrës, i shpallur në kërkim për vrasjen e trefishtë në Gjilan.

Në çdo deklarim publik dhe në çdo takim me mekanizmat që drejtoj, kam theksuar dhe kërkuar angazhimin maksimal të të gjitha strukturave për garantimin e integritetit personal dhe profesional të çdo shërbyesi publik në vendin tonë. Vazhdoj të jem i pakompromis në këtë drejtim dhe mbështes çdo formë të koordinimit ndërinstitucional që siguron institucione kredibile, të besueshme dhe plotësisht në shërbim të qytetarëve tanë.

Askush nuk është i paprekshëm apo i pandëshkueshëm veçanërisht brenda një institucioni që ka për mandat parandalimin, hetimin dhe luftimin e çdo veprimtarie ilegale në vendin tonë.

Pres që me të njëjtën vendosmëri të veprojnë edhe hallkat tjera të sistemit, veçanërisht drejtësinë, në mënyrë që qytetarët tanë të jetojnë dhe të zhvillohen në një Republikë ku sundojnë siguria, rendi dhe ligji.