Sejdiu: Është dhimbje e madhe që Rugova s’e pa pavarësinë e Kosovës

Ish-presidenti i Kosovës, Fatmir Sejdiu, ka folur për zhvillimet politike me të cilat po përballet Kosova dhe dhimbjen që ndjen për faktin se presidenti historik i Kosovës, Ibrahim Rugova, nuk ka arritur ta përjetojë shpalljen e pavarësisë së Kosovës.

“Absolutisht është një dhimbje e madhe që Rugova nuk e pa pavarësinë e Kosovës” – ka thënë Sejdiu.

Më tej, Sejdiu ka shprehur dhimbjen edhe me ish-krerët e Ushtrisë Çlirimtare të Kosovës të cilët po mbahen në Hagë me akuzat për krime lufte.

Ish-presidenti shprehu besimin e tij absolut se Thaçi dhe krerët e tjerë të UÇK-së do të japin dëshmi që do të tregojnë pafajësinë e tyre në këtë rast.

“Duhet të shprehi konsideratë për ju dhe ata që na shikojnë. Dje ka qenë ditë e gëzimit, pavarësisht rrethanave. Është një datë e rëndësishëm, e cila nuk mund të harrohet. Dy nga ish-udhëheqësit e institucioneve dhe dy apo tre tjerë që janë të akuzuar, gjenden atje dhe mendoj se është një shenjë shqetësuese sa i përket këtyre zhvillimeve. Në një gjendje të tillë, akuza është bërë nga ajo gjykatë që është ndërtuar nga Kuvendi i Republikës së Kosovës. Unë dua të besoj se këtë njerëz do japin prova të pafajësisë. Ajo që na shqetëson është karakteri monoetnik i përndjekjeve. Në Kosovë kanë ndodhur ngjarje të rënda dhe për këtë arsye është e udhës që duhet të këtë një hetim paraprak për lëvizjet që kanë ekzistuar”, ka thënë ai në një intervistë për ABC News.