EDHE UNË MARR VENDIM

Duke mos u mbështetur

në asnjë ligj të drejtësisë

në asnjë nen

në asnjë pikë të nenit

marr vendim t’i dua njerëzit

marr vendim

liria të dalë në rend të parë

dhe ai burg me atë gjak- rrënjë të saj.

 

Duke mos u mbështetur

në asnjë kushtetutë

në asnjë konventë të OKB-së

marr vendim ta bëj

një portret në qiell

me të gjithë fëmijët e vrarë

të tokës sonë të vogël.

 

Duke mos u mbështetur

në asnjë legjislacion të kohës

marr vendim t’i dua e t’i çmoj shumë kafshët.

 

TEST STANDARD

 

A më dhemb ti mua?

Unë ty a të dhemb?

Nuk ka test tjetër

me e mat saktë vetveten.

 

 

JETË PA OBORR

 

Dje

pa oborr

ke shkue në burg

e ke mbjellë shpresë.

 

Sot

pa oborr

s’ke si mbjell

as bukë në vjeshtë.

 

Dje e sot

ti vetëm me këngën

pa jetën tjetër.

 

Ringjall

Trimin edhe Vashën

djerreve tona të harrimit.

 

 

COVID-19

 

Në labirintin e natës

akrepat e orës një mijë herë u ndalën.

Sa nata jote e gjatë kjo natë,

atje ku je, o nanë!

 

Akrepat e orës

sonte një mijë herë vdiqën

mbi rrasën e ftohtë të dhimbjes,

sepse globi i tokës s’ka fuqi

të ecë më shpejt

rreth boshtit të vet,

ka COVID-19.

 

 

 

 

SHARE